സിഡ്‌നി: ശ്രീലങ്കയെ കീഴടക്കി ഇംഗ്ലണ്ട് ടി 20 ലോകകപ്പ് സെമിയിൽ പ്രവേശിച്ചു. ലങ്കയെ 4 വിക്കറ്റിന് പരാജയപ്പെടുത്തിയാണ് ഇംഗ്ലണ്ട് അടുത്ത ഘട്ടത്തിലേക്ക് പ്രവേശനം നേടിയത്. ഇതോടെ ആതിഥേയരും നിലവിലെ ജേതാക്കളുമായ ഓസ്ട്രേലിയ ചാമ്പ്യൻഷിപ്പിൽ നിന്ന് പുറത്തായി. സെമിയിലെത്താൻ കളിയിൽ ജയിക്കേണ്ടത് ഇംഗ്ലണ്ടിന് അനിവാര്യമായിരുന്നു. ഗ്രൂപ്പിൽ ന്യൂസിലന്റ്, ഇംഗ്ലണ്ട്, ഓസ്ട്രേലിയ എന്നീ ടീമുകൾ 7 വീതം പോയിന്റുകളാണ് നേടിയത്. എന്നാൽ നെറ്റ് റൺറേറ്റിൽ ന്യൂസിലന്റ് ഒന്നും ഇംഗ്ലണ്ട് രണ്ടും സ്ഥാനക്കാരായി അടുത്ത ഘട്ടത്തിലേക്ക് യോഗ്യത നേടുകയായിരുന്നു. നെറ്റ് റൺറേറ്റിൽ വളരെ പിന്നിലായതാണ് ഓസീസിന് വിനയായത്. കഴിഞ്ഞ ലോകകപ്പിൽ കപ്പുയർത്തിയവരാണ് ഓസ്ട്രേലിയ.
ഇംഗ്ലണ്ടിനെതിരെയുള്ള നിർണായക മത്സരം മഴകാരണം ഒരുപന്തുപോലും എറിയാനാകാതെ ഉപേക്ഷിച്ചതാണ് ഓസീസിന്റെ പുറത്താകലിന് പ്രധാന കാരണം. ഇന്ത്യ-പാക് മത്സരത്തിന് ശേഷം ആരാധകർ ഏറെ പ്രതീക്ഷയോടെ കാണാനിരുന്ന ഗ്ലാമറസ് മത്സരമായിരുന്നു ഇത്. ഈ മത്സരത്തിലെ വിജയി സെമിഫൈനലിലെത്താനുള്ള സാധ്യതയും ഏറെയായിരുന്നു. എന്നാൽ മത്സരം ഉപേക്ഷിച്ചതോടെ റൺറേറ്റ് നിർണായകമായി. ഒടുവിൽ ശ്രീലങ്ക-ഇംഗ്ലണ്ട് മത്സര ഫലം ആശ്രയിച്ചായിരുന്നു കംഗാരുക്കളുടെ നിലനിൽപ്പ്. ഇംഗ്ലണ്ട് ജയിച്ചതോടെ ഓസീസ് പുറത്തുപോയി.
