ന്യൂഡൽഹി: ഇന്ത്യൻ നാവിക സേനയ്‌ക്ക് നന്ദി അറിയിച്ച് ഇറാനിയൻ കപ്പലിലെ പാക്കിസ്ഥാൻ പൗരൻമാർ. ‘ഇന്ത്യ സിന്ദാബാദ്’ എന്ന മുദ്രാവാക്യം വിളിച്ചാണ് പാക്കിസ്ഥാൻ പൗരൻമാർ നാവികസേനയോട് നന്ദി അറിയിച്ചത്. ഇറാനിയൻ മത്സ്യബന്ധന ബോട്ട് തട്ടിയെടുത്ത 9 സൊമാലിയൻ കടൽക്കൊള്ളക്കാരെയാണ് ഇന്ത്യൻ നാവിക സേന കീഴ്പ്പെടുത്തിയത്. ബോട്ടിൽ ഉണ്ടായിരുന്ന 23 പാക്കിസ്ഥാൻ മത്സ്യതൊഴിലാളികളെയും സേന മോചിപ്പിച്ചിരുന്നു.
ഐഎൻഎസ് സുമേധ, ഐഎൻഎസ് തൃശൂൽ എന്നീ ഇന്ത്യൻ നാവിക സേന പടകപ്പലുകൾ യെമനീസ് ദ്വീപായ സൊകോട്രയിൽ നിന്നും 90 നോട്ടിക്കൽ മൈൽ അപ്പുറത്തെത്തി രക്ഷാദൗത്യം ആരംഭിക്കുകയായിരുന്നു. തുടർന്ന് 12 മണിക്കൂർ നീണ്ട പോരാട്ടത്തിൽ അൽ കാമ്പര്‍ എന്ന ഇറാനിയൻ ബോട്ടും അതിലുണ്ടായിരുന്ന 23 പാക്കിസ്ഥാൻ മത്സ്യതൊഴിലാളികളെയും മോചിപ്പിക്കുകയായിരുന്നു. കൊള്ളക്കാർ പിടിച്ചെടുത്ത ബോട്ടിൽ സുരക്ഷ പരിശോധന നടത്തിയ നാവികസേന മത്സ്യതൊഴിലാളികളുടെ വൈദ്യ പരിശോധനയും നടത്തി. തുടർന്ന് ഇവരെ വിട്ടയച്ചു. നാവിക സേന കീഴ്പ്പെടുത്തിയ 9 സൊമാലിയൻ കടൽകൊള്ളക്കാരെയും ഇന്ത്യയിൽ എത്തിച്ച് നിയമനടപടികൾ സ്വീകരിക്കും.
