ബ്രിസ്ബേന്: അധികം പ്രതീക്ഷയില്ലാതെ വന്നു കേരളത്തിലെ തീയേറ്ററുകളിൽ ‘ഇര’ എന്ന ചിത്രം നിറഞ്ഞോടുമ്പോൾ ഓസ്ട്രേലിയൻ മലയാളികൾക്കും സന്തോഷിക്കാം…‘ഇര’യെന്ന സർപ്രൈസ് ഹിറ്റിനു തൂലിക ചലിപ്പിച്ചത് ബ്രിസ്ബേൻ മലയാളി ആയ ‘നവീൻ ജോൺ ‘ ആണ്.
വൈശാഖ് ഉദയകൃഷ്ണ പ്രൊഡക്ഷൻസിന്റെ ബാനറിൽ സൈജു എസ് എസ് സംവിധാനം ചെയ്ത ‘ഇര ‘ യിൽ ഉണ്ണി മുകുന്ദൻ, ഗോകുൽ സുരേഷ് , മിയ ജോർജ് ,നിരഞ്ജന അനൂപ്, അലൻസിയാർ , ശങ്കർ രാമകൃഷ്ണൻ , കൈലാസ് തുടങ്ങി ഒരു വൻ താര നിര തന്നെ അണിനിരക്കുന്നുണ്ട്.ഒരു സിനിമക്കായുള്ള വർഷങ്ങളായുള്ള പ്രയത്നമാണ് ഇരയുടെ വൻ വിജയത്തിൽ നവീനെ യും സൈജുവിനെയും കൊണ്ടെത്തിച്ചത്. വൈശാഖും ഉദയകൃഷ്ണയും ചേർന്ന് ഒരു നിർമാണ കമ്പനി തുടങ്ങാനിരിക്കെയാണ് നവീനും സൈജുവും ‘ഇര’യുടെ കഥയുമായി അവരെ സമീപിച്ചത്.കഥ കേട്ട് ഇഷ്ടപ്പെട്ട ‘ പുലിമുരുകന്റെ’ സംവിധായകനും എഴുത്തുകാരനും ‘ഇര’ അവരുടെ ആദ്യത്തെ സിനിമയായി പ്രഖ്യാപിക്കുകയായിരുന്നു.