പെർത്ത്: ശാസ്ത്രാഭിരുചിയും സ്വതന്ത്രചിന്തയും മലയാളിസമൂഹത്തിൽ പ്രചരിപ്പിക്കുക എന്ന ലക്ഷ്യത്തോടെ രൂപം കൊണ്ട എസ്സൻസിന്റെ യൂണിറ്റിന് തുടക്കമായി. കഴിഞ്ഞ ശനിയാഴ്ച വൈകുന്നേരം പെർത്ത് മാണ്ടാല ഹാളിൽ ഹേമ കൃഷ്ണമൂർത്തി അവതരിപ്പിച്ച ” Celebration of Freedom ” എന്ന പ്രസന്റേഷനോടുകൂടിയാണ് യോഗം ആരംഭിച്ചത് . പുരോഗമനസമൂഹങ്ങളിൽ ജീവിക്കുമ്പോഴും ജാതി മത വർഗ്ഗ ചിന്തകളുടെ കെട്ടുപാടുകളിൽ തുടരേണ്ടി വരുന്ന മലയാളികൾ ഈ സമൂഹത്തിന് തന്നെ ഒരു ബാധ്യതയാണെന്ന തിരിച്ചറിവാണ് എസ്സൻസ് ഓസ്ട്രേലിയയുടെ രൂപീകരണത്തിലേയ്ക്ക് നയിച്ചതെന്ന് ഹേമ ചൂണ്ടിക്കാട്ടി. കേരളത്തിലെ ആചാരങ്ങളും അനാചാരങ്ങളും ഓസ്ട്രേലിയൻ സമൂഹത്തിൽ പുനരവതരിപ്പിക്കുന്നതിന്റെ ഔചിത്യവും അനൗചിത്യവും പ്രസന്റേഷന് ശേഷം നടന്ന ചർച്ചയിലെ മുഖ്യ വിഷയമായി.