ഇന്ത്യയിലെ ഏറ്റവും നീളം കൂടിയ കടൽപ്പാലമായ മുംബൈ ട്രാൻസ്-ഹാർബർ ലിങ്ക് (എംടിഎച്ച്എൽ) പ്രധാനമന്ത്രി നരേന്ദ്ര മോദി ഇന്ന് ഉദ്ഘാടനം ചെയ്യും. അടല് സേതു എന്നാണ് കടല്പ്പാലത്തിന്റെ പേര്. മുന് പ്രധാനമന്ത്രി അടല് ബിഹാരി വാജ്പേയിയുടെ പേരാണ് കടല്പ്പാലത്തിന് നല്കിയിരിക്കുന്നത്. ഗംഭീര എഞ്ചിനീയറിംഗ് വിസ്മയമാണ് ഈ പാലം. സ്യൂരിയെയും നാവാശേവയെയും ബന്ധിപ്പിക്കുന്ന 22 കിലോമീറ്റര് ദൈര്ഘ്യമുള്ള ആറുവരി പാതയാണ് എംടിഎച്ച്എല്. കടലിൽ 16.50 കിലോമീറ്ററും കരയിൽ 5.5 കിലോമീറ്ററും ദൂരത്തിലാണ് പാലമുള്ളത്. ലോകത്തിലെ പന്ത്രണ്ടാമത്തെ നീളം കൂടിയ പാലവും ഇതാണ്. മുംബൈയില് നിന്നും നവിമുംബൈയിലേക്ക് 20 മിനിട്ട് കൊണ്ട് എത്താന് കഴിയും എന്നതാണ് പ്രത്യേകത. നിലവില് രണ്ട് മണിക്കൂറാണ് ഈ ദൂരം പിന്നിടാന് എടുക്കുന്നത്.
മുംബൈയിലെ ഗതാഗതക്കുരുക്ക് കാരണം 1990-കളില് ആലോചന തുടങ്ങിയ പദ്ധതി. 2016-ല് പ്രധാനമന്ത്രി നരേന്ദ്ര മോദിയാണ് തറക്കല്ലിട്ടത്. കഴിഞ്ഞ മാസമാണ് നിര്മാണം പൂര്ത്തിയായത്. അടിയിലൂടെ കപ്പലുകള്ക്ക് തടസ്സമില്ലാതെ പോകാന് കഴിയുന്ന വിധത്തിലാണ് നിര്മാണം. നിര്മാണ സാമഗ്രികള് എത്തിക്കാനായി ഉണ്ടാക്കിയ ചെറു സമാന്തര പാലം നിലനിര്ത്തും. ദേശാടനക്കിളികളെ നിരീക്ഷിക്കാനുള്ള ഇടമായി ആ പാലത്തെ മാറ്റും.
കാറുകൾ, ടാക്സികൾ, ലൈറ്റ് മോട്ടോർ വാഹനങ്ങൾ, മിനി ബസുകൾ, ടു ആക്സിൽ ബസുകൾ തുടങ്ങിയ വാഹനങ്ങൾക്ക് മണിക്കൂറിൽ 100 കിലോമീറ്റർ വേഗപരിധി നിശ്ചയിച്ചിട്ടുണ്ട്, എന്നാൽ ഓട്ടോറിക്ഷകള്ക്കും ബൈക്കുകള്ക്കും മുച്ചക്ര വാഹനങ്ങൾക്കും മൃഗങ്ങൾ വലിക്കുന്ന വാഹനങ്ങൾക്കും പ്രവേശനമില്ല. 17,843 കോടി ചെലവിട്ടാണ് കടല്പ്പാലത്തിന്റെ നിര്മാണം പൂര്ത്തിയാക്കിയത്.