ഇന്ത്യ തദ്ദേശീയമായി വികസിപ്പിച്ച ആദ്യത്തെ ഹൈഡ്രജൻ ഫ്യൂവൽ സെൽ ബസ് ഉദ്ഘാടനം ചെയ്തു. കേന്ദ്ര ശാസ്ത്ര സാങ്കേതിക സഹമന്ത്രി ഡോ. ജിതേന്ദ്ര സിംഗ് ആണ് വാഹനത്തിന്റെ ഉദ്ഘാടനം നിർവ്വഹിച്ചത്. പ്രധാനമന്ത്രി നരേന്ദ്ര മോദിയുടെ ‘ഹൈഡ്രജൻ വിഷൻ’ അനുസരിച്ചാണ് ഈ സംരംഭം. താങ്ങാനാവുന്നതും ആക്സസ് ചെയ്യാവുന്നതുമായ ശുദ്ധമായ ഊർജ്ജത്തിന്റെ ആത്മനിർഭർ മാർഗങ്ങൾ ഉറപ്പാക്കാനും കാലാവസ്ഥാ വ്യതിയാന ലക്ഷ്യങ്ങൾ കൈവരിക്കാനും പുതിയ സംരംഭകരെയും തൊഴിലവസരങ്ങളും സൃഷ്ടിക്കാനും ഇന്ത്യയ്ക്ക് പ്രധാനമാണെന്നും മന്ത്രി ജിതേന്ദ്ര സിംഗ് വ്യക്തമാക്കി. ഫ്യുവൽ സെൽ വാഹനങ്ങളുടെ ഉയർന്ന കാര്യക്ഷമതയും ഹൈഡ്രജന്റെ ഉയർന്ന ഊർജ സാന്ദ്രതയും ഇന്ധന സെൽ ട്രക്കുകളുടെയും ബസുകളുടെയും പ്രവർത്തനച്ചെലവ് കിലോമീറ്ററിന് ഡീസൽ വാഹനങ്ങളേക്കാൾ കുറവാണെന്നും ഇത് ഇന്ത്യയിൽ ചരക്ക് വിപ്ലവം കൊണ്ടുവരുമെന്നും മന്ത്രി പറഞ്ഞു.
പൂനെയിലെ കെപിഐടി-സിഎസ്ഐആർ ആണ് വാഹനം നിർമ്മിച്ചിരിക്കുന്നത്. നിരവധി വികസിത രാജ്യങ്ങളുടെ നിരത്തുകളിൽ ഹൈഡ്രജൻ ഫ്യൂവൽ സെൽ ഉപയോഗിച്ച് പ്രവർത്തിക്കുന്ന വാഹനങ്ങൾ ഓടുന്നുണ്ട്. ഫോസിൽ ഇന്ധനങ്ങളിൽ നിന്ന് വ്യത്യസ്തമായി വായു മലിനീകരണ തോത് തീരെ കുറവാണ് ഹൈഡ്രജൻ ഇന്ധനത്തിന്. ഫ്യുവൽ സെൽ സാങ്കേതികവിദ്യ ഹൈഡ്രജനും വായുവും ഉപയോഗിച്ച് വൈദ്യുതി ഉൽപ്പാദിപ്പിച്ച് ബസിന് ഊർജം പകരുന്നു. ബസിൽ നിന്നുള്ള ഏക മലിന വസ്‍തു വെള്ളം മാത്രമാണ്. അതിനാൽ ഇത് ഏറ്റവും പരിസ്ഥിതി സൗഹൃദ ഗതാഗത മാർഗ്ഗമാക്കി മാറ്റുന്നു.
