മീര ജാസ്മിൻ നായികയായെത്തിയ റൊമാന്റിക് എന്റർടെയ്നർ ക്വീൻ എലിസബത്ത്, ഷാറുഖ് ഖാന്റെ ഡൻകി, വിവാദ ചിത്രം കേരള സ്റ്റോറി, തമിഴ് ചിത്രം സബാ നായകൻ എന്നിവയാണ് ഫെബ്രുവരി മാസത്തിലെ ഓറ്റിറ്റി റിലീസിനെത്തിയ സിനിമകൾ. ക്വീൻ എലിസബത്ത്, കേരള സ്റ്റോറി എന്നീ ചിത്രങ്ങൾ സീ ഫൈവിലൂടെയും ഡൻകി നെറ്റ്ഫ്ലിക്സിലൂടെയുമാണ് സ്ട്രീമിങ് ആരംഭിച്ചിരിക്കുന്നത്.
മീര ജാസ്മിന്‍, നരേന്‍ എന്നിവരെ പ്രധാന കഥാപാത്രങ്ങളാക്കി എം.പത്മകുമാര്‍ സംവിധാനം ചെയ്യുന്ന ചിത്രമാണ് ക്വീന്‍ എലിസബത്ത്. റൊമാൻറിക് കോമഡി എന്റർടെയിനറായിട്ടാണ് ചിത്രം ഒരുക്കിയിരിക്കുന്നത്. ചിത്രം ഫെബ്രുവരി 14 സീ ഫൈവ് റിലീസിന് എത്തിച്ചു.
പ്രമേയം കൊണ്ട് വിവാദമായ ചിത്രം ദ് കേരള സ്റ്റോറി ഫെബ്രുവരി 16-ന് സീ ഫൈവിലെത്തി. സുദീപ്‌തോ സെന്‍ സംവിധാനം ചെയ്ത ചിത്രം വിപുല്‍ ഷായാണ് നിര്‍മിച്ചിരിക്കുന്നത്. അദാ ശര്‍മ നായികയാകുന്ന ചിത്രത്തില്‍ യോഗിത ബിഹ്‌ലാനി, സോണിയ ബലാനി, സിദ്ധി ഇതാദി എന്നിവരാണ് മറ്റു കഥാപാത്രങ്ങളെ അവതരിപ്പിക്കുന്നത്.
രാജ്കുമാർ ഹിറാനിയും ഷാറുഖ് ഖാനും ആദ്യമായി ഒന്നിച്ച ചിത്രം ഡൻകി ഫെബ്രുവരി 15-ന് നെറ്റ്ഫ്ലിക്സ് റിലീസ് ചെയ്തു. പഠാൻ, ജവാൻ എന്നീ സിനിമകളുടെ വമ്പൻ വിജയത്തിനു ശേഷം ഹാട്രിക് ബ്ലോക്ബസ്റ്റുകള്‍ സ്വന്തമാക്കാൻ ഇറങ്ങിത്തിരിച്ച ഷാറുഖിന് പക്ഷേ ഡൻകിയിലൂടെ വലിയ വിജയം നേടാനായിരുന്നില്ല.
അശോക് സെൽവനെ നായകനാക്കി സി.എസ്. കാര്‍ത്തികേയൻ സംവിധാനം ചെയ്യുന്ന റൊമാന്റിക് കോമഡി ചിത്രം സബാ നായകൻ ഫെബ്രുവരി 15-നു ഹോട്ട്സ്റ്റാർ റിലീസ് ചെയ്തു. മേഘ ആകാശ്, കാര്‍ത്തിക മുരളീധരൻ, ചാന്ദിനി ചൗധരി, എന്നിവരും വേഷമിടുന്നു.ബാലസുബ്രഹ്‍മണ്യം ആണ് ചിത്രത്തിന്റെ ഛായാഗ്രാഹണം. ഇയപ്പൻ ജ്ഞാനവേലിന്റെ 1 സിനിമ പ്രൊഡക്‌ഷനാണ് നിര്‍മാണം.
അന്വേഷാത്മക പത്രപ്രവർത്തകയായി ഭൂമി പട്നേക്കർ എത്തുന്ന ചിത്രമാണ് ഭക്ഷക്. നെറ്റ്ഫ്ളിക്സിലൂടെ ഫെബ്രുവരി 9-നാണ് ചിത്രം സ്ട്രീമിങ് ആരംഭിച്ചത്. ക്രൈം ത്രില്ലറാണ് ചിത്രം. ഷാറുഖ് ഖാൻ ആണ് നിർമാണം.
സംവിധായകൻ പ്രശാന്ത് വർമ ഒരുക്കിയ സൂപ്പർ ഹീറോ ചിത്രം ഹനുമാൻ മാർച്ച് 22-നു സീ ഫൈവ് റിലീസ് ചെയ്തു. തേജ സജ്ജയാണ് ചിത്രത്തിൽ പ്രധാന വേഷത്തിൽ എത്തുന്നത്. അമൃത അയ്യർ, വരലക്ഷ്മി ശരത് കുമാർ, വിനയ് റായ്, രാജ് ദീപക് ഷെട്ടി, വെണ്ണല കിഷോർ, ഗെറ്റപ്പ് ശ്രീനു സത്യ എന്നിവരും ചിത്രത്തിലുണ്ട്.
പൊങ്കൽ റിലീസായി തിയറ്ററുകളിലെത്തിയ തമിഴ്–തെലുങ്ക് ചിത്രങ്ങൾ ഫെബ്രുവരി ആദ്യവാരം ഒടിടി റിലീസിനെത്തിയിരുന്നു. ശിവകാർത്തികേയന്റെ സയൻസ് ഫിക്‌ഷൻ ചിത്രം അയലാൻ (സൺ നെക്സ്റ്റ്), ധനുഷിന്റെ ക്യാപ്റ്റൻ മില്ലർ (ആമസോൺ പ്രൈം), മഹേഷ് ബാബുവിന്റെ ഗുണ്ടൂർ കാരം (നെറ്റ്ഫ്ലിക്സ്) എന്നിവയാണ് ഇതിലെ പ്രധാന സിനിമകൾ. വെങ്കടേഷ് നായകനായെത്തിയ തെലുങ്ക് ചിത്രം ‘സൈന്ദവ്’ ഫ്രെബുവരി 3ന് ആമസോൺ പ്രൈമിലൂടെ റിലീസ് ചെയ്തിരുന്നു.
